O proxecto é a creación dunha experiencia multimedia e interactiva titulada "Noia. A Voz do Mar", no edificio do Museo do Mar de Noia. Esta experiencia, distribuida ao longo de todos os andares do inmoble, amosará o mar como o eixo da entidade urbana e cultural de Noia, dende a súa fundación á actualidade. Introducirá de maneira novidosa aos veciños e veciñas de Noia neste relato, a través de obxectos que amosan os vínculos do mar coa vila, pero permitindo tamén escoitar as súas propias voces e relatos.
Entrecruzando o pasado e o presente, os visitantes poderán atopar parelelos entre as historias marítimas de hai séculos e os traballos e vidas das xentes actuais (o comercio, a navegación pro mares distantes, a pesca, os naufraxios, a gastronomía.....). O mar permitirá comprender a configuración da muralla e da infraestrutura portuaria excavada (planta baixa), valeranos para coñecer as orixes e evolución de Noia como encrucillada de camiños e Portus Apostoli ao logo dos séculos (primeira planta) e permitirá observar o seu impacto no medio, na cultura, na economía e na sociedade (segunda planta).
A narrativa está construída a partires da exhibición de obxectos históricos, réplicas, dispositivos interactivos e audiovisuais. A provisión de obxectos históricos realizarase a través de pezas históricas de propiedade municipal, cunto con cesións de pezas doutras entidades. O proxecto incluirá réplicas documentacis, gravacións en audio e vídeo producidas especificamente para esta Experiencia Multimedia e diferentes pezas interactivas que se executarán no hardware adquirido, tamén deseñadas de maneira específica.
O proxecto constrúe unha oferta turística e cultural diferenciada e complementaria de dous tipos de equipamentos museográficos existentes na comarca e proximidades: os museos etnográficos mariñeiros, por unha banda, e o museo de laudas gremiais e Noia. En relación aos primeiros, permite ao visitante comprender o impacto do mar na sociedade cultural local, contextualizando e dando novos sentidos ás pezas etnográficas que atesouran a memoria do mar; en canto ao museo das laudas gremiais de Noia, a experiencia permitirá explicar o contexto histórico e cultural das laudas e do gótico mariñeiro como estilo artístico particular do litoral atlántico galego a través da fundación e existencia da vila medieval de Noia. O obxetivo é construir unha experiencia que achegue un contexto de comprensión histórica, artística e social do casco histórico da vila e fomente a exploración do concello por parte dos visitantes.
Duración da experiencia: 35-40 minutos
Características da visita: autoguiada. O visitante pode descubrir todos os contidos pola súa conta e empregar todas as tecnoloxías.
Idiomas: Galego, castelán e inglés.
