A Festa do Polbo é unha festa de carácter gastronómico declarada de interese turístico pola Xunta de Galicia, na que o polbo é o protagonista. Nela dáse a coñecer a todos os e as visitantes a famosa receita de "Polbo a Mugardesa", que supón un dos atractivos  turísticos de Mugardos, poñendo en relevo a calidade e excelencia do produto entre o público e potenciar así o valor do mesmo repercutindo no seu valor engadido e fomentando o crecemento económico do territorio, xa que non só inflúe na actividade pesqueira, senon tamén na hostalería e no turismo.

Se algo destaca na cociña mugardesa é a calidade, variedade e riqueza dos produtos do mar, cociñados de forma familiar, artesanal e pausada, que ten como resultado pratos deliciosos. De feito, a gastronomía é un dos principais encantos para as/os turistas que aquí se achegan.

A frota pesqueira da zona, adicada desde tempo inmemorial á pesca da sardiña para salazón e á captura do polbo, entre outros, mantén esta tradición e segue proporcionando gran variedade de peixes, crustáceos e moluscos que constitúe o polo de atracción de xentes de dentro e fóra da comarca durante todo o ano.

Pero se hai un protagonista absoluto na gastronomía de Mugardos, este é o polbo, ocupación tradicional dos mugardeses

Nesta XXV edición os organizadores decidiron introducir cambios fundamentais na difusión e desenvolvemento do evento para acadar maior afluencia de visitantes e poder ofrecer unha maior calidade  e servizo aos mesmos e aproveitar as sinerxías existentes co sector turístico para contribuír á promoción do Concello de Mugardos e da ría de Ferrol:

Obradoiros para escolares:

Realizaronse cos escolares dous obradoiros coa temática do polbo e o mar, co obxecto de que as novas xeracións coñezan a cultura e tradición mariñeira do territorio:

- Obradoiro "O polbiño cociñeiro": Os nenos e nenas coñeceron o produto fresco e aprenderon a preparar pratos sinxelos con polbo sen esquencer as formas tradicionais de cociñalo. Participaron alumn@s de 4º, 5º e 6º de primaria dos Colexios Unión Mugardesa, Santiago Apóstol e Loyola, participando un total de 120 rapaces, repartidos en 6 talleres.

- Obradoiro "PInta o teu mar": Realizose coa Escola de pintura municipal e consistiu en realizar un mural coa temática do mar. Contouse coa colaboración de pescadores que lles ensinaron aos rapaces os diversos aparellos de pesca que se utilizan principalmente na pesca do polbo.

Obradoiro de cociña para profesionais da hostalería:

Foi realizado por un afamado cociñeiro do Grupo NOVE. Dirixido para profesionais do sector da restauración, e en particular, a cociñeiros e propietarios, establecementos que teñan o reto de profundar en propostas e conceptos gastronómicos que cualifque a oferta de Mugardos. Mellora na capacitación dos distintos profesionais e amosar novas formas de preparar os produtos locais do mar, como é o caso do polbo, coa cociña tradicional e as técnicas de vangarda.

Como novidade este ano, tamén se habilitaron medidas de transporte alternativo, que non só beneficiaron ao benestar dos e das visitantes e ao medio ambiente, senon que indirectamente tamén foron beneficiadas as empresas de transporte de viaxeiros marítimo da comarca, xa que o Concello de Mugardos contratou unha liña de transporte marítimo entre Mugardos e Ferrol.