O proxecto consistirá  na posta en valor da identidade mariñeira do porto de Portosín, a través da reforma dunha nave que visibilice o traballo das mulleres do sector pesqueiro deste porto e poña en valor o seu recurso pesqueiro, mellorando considerablemente as dúas condicións de traballo contribuíndo deste xeito ao reforzo do papel das comunidades pesqueiras no desenvolvemento local e da gobernanza dos recursos pesqueiros e actividades marítimas locais.

Isto repercutirá na posta en valor do recurso pesqueiro do porto de Portosín a través do incremento da promoción do selo Azul de Portosín contribuíndo á dinamización da actividade portuaria, ao converter esta infraestrutura nunha nave visitable cun punto de información ao visitante que transmita esta identidade mariñeira.

Cada entidade colaboradora farase cargo dunha das partes do proxecto, aínda que todas elas participaron no deseño do mesmo.

A confraría de Portosín asumirá integramente a rehabilitación da nave, dotándoa das condicións necesarias e dunha imaxe atractiva para o visitante.

A asociación de Redeiras do Cerco contribuirá no equipamento exterior da nave que consistirá na dotación de sombrillas e parasois para cada redeira, para desenvolver o seu traballo no exterior da nave cando sexa necesario, as sombrillas levará a imaxe gráfica da nave e do punto de información turística constituíndo un elemento de visibilización desta identidade no exterior da nave.

O concello de Porto do Son asumirá o equipamento do punto de información turística e farase cargo da dotación de persoal para a xestión da mesma cando sexa necesario, o queipamento previsto visibilizará a base de paneis gráficos a identidade que se pretende.