Durante a anualidade 2025, levarase a cabo a inversión nun sistema de encofrados metálicos e nos accesorios necesarios para a fabricación e manipulación dos bloques prefabricados de formigón. Estes accesorios, fornecidos polo mesmo provedor, permitirán optimizar o movemento e almacenamento dos bloques tanto nas instalacións da empresa como nos lugares de obra.

Previamente, realizaranse probas de formigonado con diferentes porcentaxes de árido reciclado, co obxectivo de determinar a mellor composición para garantir a resistencia, durabilidade e calidade dos bloques. Para estas probas e o proceso inicial de produción, empregaranse medios propios como carretilla elevadora, camión grúa, formigonera e vibradores. No caso de ser necesario, recorrerase tamén ao alugueiro de medios auxiliares para o desprazamento ou a execución de medicións en obra.

O formigón será subministrado por un provedor externo, mentres que o árido reciclado será achegado pola empresa galega Abonomar, autorizada como planta de transformación de residuos mariños pola Xunta de Galicia. Esta empresa é pioneira en Galicia na reciclaxe de conchas de bivalvos, que transforma en árido de distintos gramaxes apto para a fabricación de formigón.

A produción terá lugar nas instalacións da empresa. O árido engadirase á tolva do camión formigonera antes do vertido da mestura nos moldes. Unha vez desmoldados, os bloques serán apilados e almacenados ata o seu subministro ou uso en obra. Estímase unha produción semanal progresiva, dirixida tanto á venda directa como á execución de proxectos integrais, como a construción de muros.

Entre as principais aplicacións dos bloques destacan os muros de contención, divisións de naves ou parcelas, cerramentos de garaxes, losas para depósitos ou elementos sinalizadores, e outras estruturas tanto temporais como permanentes.

Como parte do proxecto, crearase un novo posto de traballo para reforzar esta liña produtiva. Procurarase un perfil de menos de 40 anos en situación de desemprego, ao que se lle proporcionará formación en prevención de riscos e na operativa do proceso produtivo.

Por último, desenvolverase unha campaña de difusión para dar visibilidade á iniciativa. Esta incluirá o deseño de folletos, publicacións en redes sociais e aparicións en medios especializados como o monográfico anual sobre construción de La Voz de Galicia, dirixidas tanto a público minorista como a distribuidores e clientes do sector.