A actividade central será a representación dunha obra de títeres creada especificamente para o proxecto pola compañía Mircromina Teatro de Títeres, con sede en Mondoñedo. A través desta proposta escénica adaptada ao público infantil, os nenos e nenas terán a oportunidade de descubrir o mundo do mar e as súas tradicións, comprender a importancia da conservación do medio mariño e coñecer os beneficios de consumir produtos do mar de proximidade.

As funcións desenvolveranse nos propios centros educativos, en horario lectivo, permitindo que todo o alumnado participe sen necesidade de desprazarse. No total, están previstas 32 actuacións en centros escolares dos concellos de Arteixo, Culleredo, Cambre, Bergondo, Sada e Oleiros, cunha estimación de máis de 5.000 nenos e nenas como público directo.

O proxecto compleméntase con accións de difusión e sensibilización: deseño e envío de carteis aos centros, colocación dun roll-up institucional durante cada representación, difusión a través das redes sociais da compañía teatral e envío de notas de prensa a medios comarcais.

Esta proposta contribúe, ademais, á promoción de valores transversais como a igualdade de xénero, a diversidade e a inclusión, incorporando personaxes e situacións que rompen estereotipos e que fomentan o respecto ás diferenzas.

O circuito de títeres busca, en definitiva, que o alumnado non só goce dunha experiencia artística e educativa, senón que tamén interiorice a relevancia do medio mariño na súa contorna, adquirindo ferramentas para valoralo, coidalo e transmitilo no futuro.