María Jesús Alonso, Presidenta da Asociación de Redeiras Cabo Burela
“O traballo das redeiras é esencial para o sector do mar, somos un dos primeiros elos da cadea”
A pandemia da Covid-19 mantén o sector do mar con menor actividade. Cal é a situación das redeiras de Burela?
Estamos sen traballar dende o comezo do estado de alarma e volvemos á actividade o 4 de maio.
E o voso traballo é clave para os mariñeiros.
Si, é esencial, porque sen o material que elaboramos o sector non pode traballar da mesma forma e coa mesma eficacia.
Para as persoas que non coñecen o voso labor, en que consiste a vosa rutina habitual?
Cada unha confecciona as súas propias redes e ten o seu espazo, pero tamén compartimos materiais e espazos. Os horarios e a continuidade da xornada varían en función de cada traballadora, xa que hai algunhas que proceden de localidades distintas a Burela. As que somos de aquí facemos entre oito e nove horas diarias.
Precisamente ese contacto e proximidade entre as traballadoras podía facer complicado manter a actividade nestas últimas semanas, polos riscos...
A maioría da xente que tiña patoloxías tiña medo de traballar por risco a contaxios e decidimos parar. Como agora se están reactivando algunhas actividades do mar, acordamos voltar, pero non todas o farán debido a cuestións de saúde.
Unha das razóns para a volta tamén será a necesidade de ingresos.
Claro, se non traballamos, non cobramos. E os gastos mantéñense, desde a cota da Confraría ata a da Seguridade Social.
E hai embarcacións que poden ter carencia de redes?
A maioría da nosa clientela soe ter repostos e non é preciso depender a diario ou en tempo real do noso traballo. Isto foi unha mellora que se implementou no seu día para así poder flexibilizar o noso traballo e garantir a autonomía das embarcacións.
Por qué consideras que é importante o voso labor?
O noso labor é moi importante porque sen redes os barcos non poden ir ao mar, aínda que somos as menos visibles, incluso sendo un dos primeiros elos da cadea. E o sector do mar precisa maior recoñecemento pola contribución que fai á nosa dieta, facéndoa máis rica e saudable.