O proxecto CATA&ROSE consiste na edificación dun novo establecemento hostaleiro rural de 2 estrelas no lugar da Gandariña, en O Grove, dotado de 8 cuartos para estancias turísticas, zonas comúns e xardín con horta e instalacións de descanso.

Trátase dunha edificación en dous volumes rectangulares e soto, planta principal e baixo cuberta, conectados entre si pola zona de recepción e os espazos comúns (cociña, comedor, zona de estar...).

A edificación está construída a dous augas con cuberta en lousa negra e exterior de pedra do país, ocos de fiestras con vistas ao mar para permitir aos visitantes desfrutar das vistas á ría e do estupendo solpor desa zona da península. A cuberta prevista será con vigas á vista procedentes das explotacións de acuicultura da zona (bateas).

A zona común (salón) está dotada dunha cheminea central para facer máis acolledor o espazo, e a decoración xenérica será sobria e con materiais nobres e sostibles.

A cociña do establecemento, que está deseñada como centro de actividades (obradoiros de gastronomía, elaboración artesanal...) estará inspirada nas cociñas tradicionais galegas dos nosos ancestros, e estará sempre a disposición dos hóspedes

O edificio é totalmente accesible, e de feito desde o aparcadoiro hai unha rampla de acceso á recepción. Os baños están adaptados para persoas con problemas de mobilidade.

Un dos 8 cuartos está deseñado para grupos familiares, con dotación especialmente orientada para nenos (baños adaptados para pequenos, espazos máis amplos, maior número de camas...)