Sorry, you need to enable JavaScript to visit this website.

Unha nova convocatoria para financiamento de proxectos ligados ao mar da man do Galp Ría de Pontevedra

  • O prazo de solicitude está aberto ata o 28 de febreiro

Xa está aberta a derradeira convocatoria de axudas do GALP Ría de Pontevedra con cargos ao remanente dos fondos do período 2014 – 2020, prorrogado ata 2022. O prazo de solicitude remata o vindeiro 28 de febreiro de 2022.

A convocatoria de axudas (Orde do 27 de decembro de 2021) está aberta a particulares, empresas, entidades e asociacións interesadas en desenvolver proxectos e actividades vinculados ao mar. En concreto, o GALP ofrece liñas de financiamento para iniciativas relacionadas co patrimonio cultural, o medio ambiente ou a posta en valor do produto do mar pertencentes aos concellos de Bueu, Marín, Pontevedra, Poio, Sanxenxo e Meaño.

As axudas
Os proxectos de empresas e autónomos poderán conseguir ata o 50 % do financiamento do seu investimento, que pode chegar ata o 80% para proxectos vinculados á pesca costeira artesanal. Pola súa banda, nos proxectos non produtivos con finalidades non económicas, que cumpran determinados requisitos, a axuda pode ser do 100 % da subvención.

A través destas axudas, o GALP Ría de Pontevedra apoiou nos últimos anos proxectos do máis diverso, desde melloras en instalacións portuarias até rutas turísticas pasando por programas gastronómicos e de divulgación da cultura mariñeira. A finalidade dos fondos europeos xestionados polo GALP Ría de Pontevedra é dinamizar o tecido socioeconómico dos territorios da área de influencia da ría, promovendo a profesionalización e a formación do sector.

Toda persoa con algunha idea de negocio a desenvolver no seu territorio pode informarse nas oficinas do GALP situadas no porto de Marín (Departamento de exportadores, 14. Lonxa de Marín.) ou telefonicamente no 886 213 015