A pasada semana tivo lugar unha xuntanza de coordinación das xerencias dos GALP promotores do Proxecto Bitácoras, unha iniciativa de cooperación na que buscan poñer en valor o labor dos grupos na dinamización do programa e dar visibilidade á repercusión do seu papel nas zonas costeiras galegas.

 

Bitácoras quere incidir no que supuxo o programa no impulso de iniciativas ligadas ao crecemento azul, ao desenvolvemento sustentable e no reforzo da cohesión social nas zonas costeiras. Busca fomentar sinerxías entre iniciativas promovidas nos diferentes territorios, a través do traballo conxunto dos grupos e axentes locais, reforzando o papel do sector pesqueiro no liderado de proxectos.

 

 

Na xuntanza debatironse conxuntamente todos estes puntos entre as xerencias dos cinco grupos que promoven o Proxecto Bitácoras, definindo entre todas unha proposta de horizonte estratéxico  que entendemos que pode valer para facer máis accesible o programa para as e os axentes do territorio e o sector pesqueiro.

 

As xerencias dos GALP Golfo Ártabro Norte, Golfo Ártabro Sur, Costa Sostible, Ría de Arousa e Ría de Pontevedra concordaron na importancia de orientar as súas estratexias nos obxectivos da economía azul, dirixindo o programa cara a consecución do Pacto Verde.  Ao longo dos vindeiros meses terán lugar distintas actividades de posta en valor dos grupos no marco deste proxecto, como parladoiros nas distintas zonas costeiras ou a creación dun catálogo e unha Mostra Itinerante de Boas Prácticas nas Bitácoras.