- O Espazo Emprendedor do Parque Azul acolleu este venres a primeira das catro sesións dunha iniciativa que combina formación nutricional e práctica culinaria
- O programa continuará os días 9, 16 e 23 de outubro para afondar no coñecemento, conservación e preparación dos produtos pesqueiros e marisqueiros
Coñecer mellor os produtos do mar para aprender a escollelos, conservalos e incorporalos á alimentación diaria. Con este obxectivo, 25 persoas iniciaron este venres en Marín o II Obradoiro de nutrición e cociña con produtos do mar, unha iniciativa do GALP Ría de Pontevedra que durante o mes de outubro combinará coñecementos sobre alimentación saudable con formación práctica na cociña.
O Espazo Emprendedor do Parque Azul acolleu este venres, 2 de outubro, a primeira das catro sesións previstas. O programa continuará os días 9, 16 e 23 de outubro, en horario de 16:30 a 18:30 horas, dando continuidade a un ciclo que este ano xa pasou por Pontevedra e Poio.
Da nutrición aos fogóns
Ao longo das catro xornadas, as persoas participantes abordarán cuestións como a planificación dunha dieta equilibrada, a selección e correcta conservación dos alimentos ou as propiedades nutricionais do peixe e do marisco. Estes coñecementos trasladaranse posteriormente aos fogóns coa elaboración de diferentes receitas con produtos do mar.
As 25 persoas participantes percorrerán así todo o proceso, desde o coñecemento e a selección do produto ata a súa preparación na cociña, incorporando recursos aplicables á alimentación diaria.
Un ciclo que percorre o territorio
Marín toma o relevo de Pontevedra e Poio, onde o programa desenvolveu oito sesións entre abril e xuño. Con esta nova parada, o GALP continúa achegando ao territorio unha iniciativa que conecta alimentación saudable, gastronomía e produto local, promovendo o coñecemento e o consumo dos recursos pesqueiros e marisqueiros da Ría de Pontevedra.
A actividade enmárcase na Estratexia de Desenvolvemento Local Participativo (EDLP) do GALP Ría de Pontevedra e no seu traballo para poñer en valor os produtos do mar e fortalecer a relación entre a cidadanía e o sector marítimo-pesqueiro.
