Sorry, you need to enable JavaScript to visit this website.

Os III Premios da Economía Azul xa teñen gañadores

Os III Premios da Economía Azul xa teñen gañadores

Onte coñecimos por fin aos gañadores dos Premios Economía Azul deste ano. Na súa terceira edición, foi o Museo Centro Gaiás da Cidade da Cultura o espazo que albergou a gala na que se entregaron os galardóns. Así, voltouse a recoñecer unha vez máis os mellores proxectos sustentables das zonas pesqueiras de Galicia levados a cabo baixo as axudas para iniciativas dos grupos de acción local do sector pesqueiro (GALP).

As encargadas de conducir o evento como presentadoras foron as actrices Patricia Vázquez e Rocío González que se deixaron levar por un guión de Quico Cadaval. 

Estiveron presentes a conselleira do Mar, Rosa Quintana; a directora xeral de Desenvolvemento Pesqueiro, Susana Rodríguez Carballo; a conselleira de Medio Ambiente, Ánxeles Vázquez; os representantes das confrarías de pescadores; as presidentas e presidentes dos Grupos de Acción Local Pesqueira de Galicia e os representantes dos proxectos finalistas que competían polos premios.

Desta vez o peche musical protagonizouno o dúo Caamaño&Ameixeiras que interpretou tres pezas tradicionais da música galega.

Os Premios da Economía Azul están promovidos pola Consellería do Mar, a través da Dirección Xeral de Desenvolvemento Pesqueiro e con estes galardóns preténdese visibilizar o traballo dos GALP nas zonas pesqueiras, e motivar a potenciais promotores para que presenten proxectos ao abeiro das EDLP dos GALP.

A terceira edición contou con catro categorías diferentes: Mellor proxecto de Apoio á Pesca Costeira Artesanal; Mellor proxecto de Creación de emprego; Mellor proxecto de Diversificación e Mellor Proxecto de Economía Circular. Os proxectos finalistas foron seleccionados por unha comisión da Dirección Xeral de Desenvolvemento Pesqueiro que escolleu 3 proxectos por cada categoría entre as propostas presentadas polos GALP. Os criterios desta selección están determinados polos beneficios que os proxectos son capaces de xerar para o sector pesqueiro; a súa contribución á creación de emprego nas zonas pesqueiras; o reforzo da identidade, a cultura e o patrimonio local da zona pesqueira; os elementos innovadores no contexto local; e a creación de oportunidades para mulleres e mozos/as no sector pesqueiro ou marítimo. 

A escolla dos mellores proxectos levouse a cabo cunha votación pública a través da rede. Así, os gañadores foron escollidos polos internautas que votaron por eles na web galp.xunta.gal dende o 4 ao 25 de novembro.

Finalmente proclamáronse campións os seguintes proxectos:

Mellor proxecto de apoio á pesca costeira artesanal: 

Acondicionamento do espazo da lonxa de Portonovo para a mellora do uso turístico e comercial implantando novas tecnoloxías – enLonxaTour. 

Confraría de Pescadores de Portonovo (GALP Ría de Pontevedra)

O proxecto persigue a mellora da comercialización dos produtos pesqueiros da lonxa de Portonovo e a mellora da oferta de turismo mariñeiro na lonxa ligado á sensibilización medioambiental a través dunha xestión adecuada dos medios. Para levar a cabo este proxecto precisamos contratar a unha persoa a tempo completo para que se encargue da xestión da lonxa no ámbito comercial e no ámbito turístico.

Mellor proxecto de creación de emprego: 

Produción de algas comestibles das Rías Baixas galegas. 

H.Q. Seaweed SL (GALP Ría de Vigo-A Guarda)

A meta que persegue este proxecto é darlles valor aos produtos do mar para a súa exportación, destacando a alga das nosas rías. O obxectivo é facer chegar as algas a calquera distribuidor. Ter un equipo humano de calidade, estable e de confianza. Xerar riqueza na zona. Dar un valor engadido a un produto de pouco valor. Xerar unha sustentabilidade do ecosistema mariño. Investigar e desenvolver sobre as TIC aplicadas ao sector. Conseguir a equiparidad e a conciliación persoal dos traballadores. Fomentar a formación dos empregados e a súa autonomía

Mellor proxecto de diversificación: 

Creación da aula do mar A Mariña. Asociación de Saúde Mental A Mariña 

GALP A Mariña – Ortegal

Trátase dun proxecto de integración social para as persoas con enfermidade mental crónica na cal se porá en valor o patrimonio costeiro, os recursos patrimoniais e ambientais da zoa A Mariña-Ortegal. Este proxecto se desenvolverá en la Unidade Residencial de Cervo (única residencia especializada en doenzas mentais na provincia de Lugo).

Mellor proxecto de economía circular: 

Centro de transformación do lixo mariño. Asociación de mulleres do sector pesqueiro Seo de Fisterra e Ría de Muros-Noia (GALP Seo de Fisterra Ría de Muros-Noia Costa Sostible).

Consiste na articulación dunha rede de actividades ao redor dun espazo para levar a cabo actuacións de transformación do lixo xerado sobre todo na actividade pesqueira e procedente do entorno mariño.

O principal obxectivo do proxecto, diríxise a xerar vínculos e dinámicas que faciliten a aprendizaxe entre os diferentes axentes, profesionais e investigadores que desenvolven a súa actividade, centralmente, ao redor do medio mariño, establecendo novas sinerxías colaborativas, de intercambios de información e coñecementos para unha mellor xestión dos recursos e medios mariños.

Fíxose entrega dun premio especial ao proxecto plancton de Afundación obra social Abanca.

Ademais dos gañadores de cada unha das categorías, este ano incluise un recoñecemento a maiores que lle foi otorgado ao proxecto Plancton desenvolvido por Afundación Abanca.

Este proxecto permitiu retirar durante o ano 2021 case 19 toneladas de residuos dos areais e fondos mariños de distintas zonas costeiras da comunidade.

Con este recoñecemento preténdese destacar unha acción, que aínda sendo realizada á marxe dos GALP, ten unha importante relevancia para o conxunto do sector así como para a protección do medio ambiente.