Iniciativa promovida polo Concello de Ares e apoiado por diferentes entidades do mundo do mar e colectivos deste ámbito territorial, co obxecto de incrementar iniciativas de diversificación nesta zona costeira e consolidala como un destino turístico atractivo.

Proxecto de turismo mariñeiro, que engloba actividades e recursos medioambientais e etnográficos dirixidos á poboación da comarca de Ferrolterra e todas as persoas visitantes que elixan esta zona como destino turístico. Os produtos, o patrimonio e a etnografía da ría de Ares son unha realidade que con este proxecto o Concello de Ares quere poñer en valor. O mundo do mar conta cun recoñecemento e coñecemento entre a poboación local que implica varios vectores: a historia, a etnografía, a cultura, as tradicións, a arquitectura popular, os oficios, as prácticas pesqueiras, os seus produtos do mar, as lendas e contas, os sinais marítimos, a gastronomía, a actividade cultural...etc. Tamén pretende contribuír a mellorar a estratexia turística e a formación do tecido empresarial deste Concello, reorientando as súas capacidades empresariais e detectando as novas inquedanzas das persoas emprendedoras, sobre todo do mar, co obxecto final de conseguir incorporar mariñeiros ou familiares dos mesmos a unha segunda actividade.