Actividades de turismo mariñeiro interpretativo, sensibilización ambiental e valorización do patrimonio pesqueiro na Ría de Vigo, dirixidas a achegar á cidadanía a realidade da pesca artesanal sostible.

As accións principais consisten na realización de saídas de pescaturismo en embarcación profesional para un máximo de dúas persoas por quenda, en horario de mañá ou tarde, nas que se levará a cabo navegación interpretativa por espazos de alto valor ecolóxico incluídos na Rede Natura 2000 e no Parque Nacional Marítimo-Terrestre das Illas Atlánticas de Galicia. Durante a experiencia mostrarase o uso das artes de pesca con liña e cordel, explicarase o oficio mariñeiro, a trazabilidade do produto na lonxa e a importancia da conservación dos ecosistemas mariños e da súa biodiversidade, finalizando cunha degustación de produtos da pesca local.

O proxecto incorpora a realización anual de accións de limpeza de praias, a sensibilización sobre cambio climático e aforro enerxético, así como o uso de ferramentas dixitais (tablet e guía electrónica de especies mariñas) para reducir o consumo de materiais impresos e a pegada de carbono.

Prevese tamén a colaboración con entidades sociais, incluídas asociacións vinculadas á síndrome de Down, para o desenvolvemento de obradoiros do mar de carácter inclusivo e a difusión accesible da actividade, garantindo a participación en condicións de igualdade e contribuíndo á sensibilización social.