O proxecto ten como obxectivo principal fomentar o benestar social e preservar o patrimonio cultural das zonas pesqueiras e acuícolas dos Concellos de Vilaboa, Moaña e Cangas. A iniciativa está dirixida a mulleres, persoas mozas, persoas con Alzheimer e outras demencias, persoas con discapacidade e persoas que viven en zonas rurais, garantindo un enfoque inclusivo e interxeracional. 

O traballo de reminiscencia é o eixo central do proxecto, promovendo actividades que rescaten e poñen en valor as vivencias e o legado cultural vinculado ao mar. Deste xeito, preténdese crear espazos de encontro nos que a memoria colectiva teña un papel fundamental, reforzando o sentimento de identidade e comunidade.

Entre as iniciativas máis salientables do proxecto destacan:

1. Posta en marcha dun programa de actividades para persoas maiores en Vilaboa: Trátase dunha iniciativa pioneira que permite desenvolver un modelo de atención sostible e replicable, integrado no novo centro sociocomunitario do Concello de Vilaboa. O proxecto busca dotar este espazo de contido e dinamizalo, creando un programa de actividades vinculado á cultura mariñeira. A través de obradoiros, encontros e iniciativas interxeracionais, fomentase o envellecemento activo, a socialización e a posta en valor da memoria colectiva do mar en Vilaboa.

2. Revalorización do papel das mulleres vinculadas ao mar: O proxecto busca dar visibilidade ao papel fundamental das mulleres na cultura mariñeira, a través de actividades que recollan as súas historias de vida e vivencias. Participan mulleres que comparten a súa conexión co mar, incluíndo aquelas que traballan en mundos altamente masculinizados, como nas cooperativas de armadores e nos institutos de investigación. 

3. Espazos interxeracionais de aprendizaxe e xogo. XOGOS NA MARÉ:
Creanse espazos onde as crianzas poidan descubrir e experimentar xogos tradicionais relacionados co mar. Isto permite a transmisión de saberes e prácticas culturais entre xeracións, garantindo a continuidade destas tradicións.

4. Actividades de sensibilización ambiental sobre a conservación do mar e dos seus ecosistemas:O proxecto inclúe charlas e obradoiros sobre o impacto da contaminación mariña, a biodiversidade e as boas prácticas para protexer os ecosistemas costeiros. 

5. Actividades culturais vinculadas ao mar:

100 anos das prazas de abastos: Representacións didácticas sobre a evolución das prazas e a súa importancia na sociedade, con especial atención ao patrimonio material e inmaterial.
As peixeiras da patela: Posta en valor do traballo das peixeiras nas parroquias de Cangas e Moaña, mediante representacións e actividades didácticas.
Os botiforas: Celebración de festas vinculadas aos traballos do mar, incorporando actividades gastronómicas e culturais.

6. Intervención nos centros de persoas con discapacidade: Organización de obradoiros de reminiscencia, charlas e saídas para achegar o mar ás persoas usuarias, fomentando o contacto coa natureza e a participación en actividades culturais relacionadas co patrimonio mariñeiro.

A finalidade do proxecto busca fortalecer os lazos comunitarios, mellorar o benestar das persoas en situación de vulnerabilidade e preservar a riqueza cultural das zonas costeiras, asegurando a súa transmisión ás futuras xeracións. O proxecto fomenta a conexión interxeracional e a valorización do patrimonio mariñeiro, creando espazos de encontro e participación para promover o sentido de identidade e comunidade.