• dentro do proxecto da escola de navegación tradicional de portonovo van ser realizadas entre os meses de xuño e setembro e cunha periodicidade semanal (se ben as datas concretas van depender das condicións meteorolóxicas e serán comunicadas con suficiente antelación) tres tipos de actividades ben diferenciadas:

Por un lado están os bautismos de mar e madeira, que van ser unha serie de saídas de navegación (10 saídas de 4 horas de duración cada unha) orientadas a ofrecer aos participantes un primeiro contacto coa navegación nunha embarcación tradicional.

• Vanse beneficiar destas saídas un total de 40 individuos (4 por cada xornada) e a metade das prazas estarán reservadas para persoas con discapacidade (ofrecidas a asociacións do territorio dedicadas ao apoio á discapacidade, como "aspace", "juan xxiii" ou "xuntos").
• Nestas xornadas vaise visitar por terra o entorno do porto de portonovo (ofrecendo unha visión xeral do traballo dos diferentes profesionais do sector) e por mar a diferentes portos e puntos de interese etnográfico e natural da ría, así como zonas nas que se poidan observar actividades pesqueiras e marisqueiras en directo.

Polo outro temos o curso de iniciación á navegación tradicional, que vai consistir nunha formación teórico-práctica de 20 horas de duración dividida en 5 xornadas e da cal vanse poder beneficiar un total de 20 persoas (divididas en dous grupos de 10 individuos).

• O perfil dos potenciais beneficiarios é o dunha persoa que ten interese pola vela e/ou as embarcacións tradicionais e, sendo así, o noso obxectivo neste caso é ofrecer un achegamento inicial ao mundo da vela tradicional e transmitir os coñecementos para que os participantes adquiran unhas habilitacións básicas como patrón.

E finalmente a participación en eventos dentro do territorio da ría de Pontevedra con presenza de embarcacións tradicionais galegas (como o festival do cine do mar de Marín, o encontro de embarcacións tradicionais de Bueu, a festa do mar de Combarro e a feira franca de Pontevedra)

• Neste caso o cupo de participantes será de 40 persoas (10 por cada evento mencionado) e a actividade consistirá nunha navegación no entorno do punto de celebración (o traslado das embarcacións farase previamente en remolque) e unha visita guiada ás embarcacións alí presentes, con explicacións sobre as diferentes tipoloxías e usos.
• En tódolos casos a inscrición nas actividades será aberta e gratuíta (a través da súa difusión pública) e en caso de ser necesario completarase o número de participantes (ata o máximo de 100 xa mencionado) a través do convite directo a colectivos sociais e culturais do territorio do Galp da ría de Pontevedra.