O proxecto consiste na realización de actuacións encamiñadas á posta en valor da cultura mariñeira e marisqueira da zona de Cedeira como parte indispensable dos valores propios do territorio; na concienciación sobre a riqueza natural, en materia paisaxística e de biodiversidade litoral, e na importancia do coidado e uso sostible destes recursos naturais mariñeiros, así como, á promoción de actividades de natureza tendo en conta as características diferenciais da costa da Mariña-Ortegal en Cedeira: turismo mariñeiro, flora e fauna (biodiversidade), fotográfico e patrimonial, permitindo, recuperar o patrimonio mariñeiro e achegar á poboación local e visitantes unha proposta de actividades turísticas sostibles no litoral con identidade propia e vinculada cos recursos naturais e pesqueiros, que dinamiza e diversifica o sector. A iniciativa ten a intención de promocionar o patrimonio de Cedeira en todos os seus ámbitos, creando produtos turístico-ambientais que desestacionalicen e cren sinerxías positivas para o desenvolvemento do medio local. Realizaranse diferentes rutas turísticas polo litoral mesturando cultura, natureza, turismo mariñeiro e patrimonio, creando itinerarios de distintas temáticas: que poñan en valor a actividade de pesca e o marisqueo de Cedeira en lugares emblemáticos de actividade extractiva; que permitan coñecer o patrimonio do mar; que divulguen a importancia a nivel de biodiversidade do litoral e que a través da fotografía permitan concienciar sobre a problemática da contaminación do litoral.