A principal finalidade do proxecto é promover unha cultura marítimo-pesqueira viva, dinámica e xeradora de contidos, que teña como eixes centrais:
1. Mellorar a información e divulgación do patrimonio marítimo, ampliando a oferta e o catálogo de actividades a realizar, diversificando as opcións no ámbito da cultura mariñeira, literatura, arte, gastronomía, ...
2. Estimular o coñecemento do medio mariño e costeiro e dos seus grandes valores que sustentan o benestar das comunidades costeiras e a súa calidade de vida, así como a concienciación e aposta por un futuro máis sostible.
3. Dignificar a cultura mariñeira e a súas actividades económicas e sociais.
A Costa da Morte ten no patrimonio marítimo, material e inmaterial, unha das maiores potencialidades de desenvolvemento e, polo tanto, é un dos principais recursos xeradores de riqueza. Para isto é necesario desenvolver actuacións de maneira que se converta nun produto de calidade, sostible e que poña en valor ás actividades económicas relacionadas co mar e co propio sector pesqueiro.
Estas actuacións, a súa vez, teñen que converterse nun reforzo de pertenza a un territorio  con identidade que supoña un orgullo para a súa xente e unha remuda xeracional das actividades relacionadas co mar. Nesta liña o impulso da cultura tamén crea sinerxías e novas iniciativas económicas de relevancia para o desenvolvemento dun territorio.
A cultura tamén é un reclamo para as persoas visitantes xa que, actualmente,  é un dos motores principais de desenvolvemento económico, axudando a crear un produto turístico de calidade. É por isto, que a Costa da Morte caracterizada pola forte imaxe do mar, convértese nunha oportunidade para seguir poñendo en valor a ampla cultura marítima existente e, a súa vez, xerar novos contidos que fagan da Costa da Morte un territorio con personalidade e identidade propia, na que o mar e a súa cultura sexa a protagonista. O proxecto pretende atender a un modelo multisectorial de desenvolvemento que integra a conexión do turismo, os recursos ambientais e o patrimonio, tendo sempre como fíos condutores os produtos e actividades pesqueiras.
O proxecto, polo tanto, pretende poñer en valor o patrimonio cultural como elemento de identidade marítima da Costa da Morte e, a súa vez, xerador de riqueza fornecendo de máis recursos a oferta turística do territorio dunha maneira sostible, implicando ao propio tecido sociocultural e o propio sector pesqueiro. Crearanse sinerxías entre sectores: turístico, cultural, social, hostalería e restauración e o pesqueiro. Avanzarase na dixitalización do patrimonio cultural con accións que inclúen a recompilación de recursos culturais existentes, xeración de novos contidos e  divulgación dos mesmos, de maneira accesible.
O proxecto conserva e promove o patrimonio adquirindo un compromiso co territorio e co sector pesqueiro para posta en valor da cultura mariñeira a través de diferentes disciplinas: lúdica, gastronómica, arte, lingua, paisaxe ... entre outras.