Proxecto promovido pola Asociación de Percebeiros e Percebeiras, que to-mando como punto de partida a diagnose do territorio e unión dos axentes locais ligados ao mar, realizan actividades de dinamización e posta en valor dos oficios mariñeiros, aproveitamento sostible dos recursos mariños e de emprendemento ao redor da economía azul.
AtlanticHUB preséntase como un espazo físico/virtual para a posta en común, o intercambio, a conexión e a concentración dos grandes grupos de stakeholders ligados ao mar na Costa da Morte. Confrarías, armadores, conserveiras, pescadores, mariscadores, percebeiros, comercializadores, peixeiros, distribuidores, restauradores e consumidores terán así en AtlanticHUB un punto de encontro para intercambiar opinións, converter Costa da Morte nun auténtico “océano azul”, fomentar un maior emprendemento ligado ao mar, incentivar a investigación e a innovación na costa atlántica e camiñar, xuntos, cara ao que moitos xa denomiman o “horizonte 2030”. Nel, debúxase un futuro no que todos os sectores de actividade e a sociedade no seu conxunto transitan cara a unha maior integración, inclusión, igualdade, paridade e sustentabilidade.
AtlanticHUB busca espremer todo o talento dos axentes do mar locais para, da man de expertos, ser capaces de definir as bases para construír un futuro no que Costa da Morte goce de máis emprendemento, de máis innovación, de máis oportunidades e de máis unión; un novo espazo de converxencia a beiras do mar no que empresas, emprendedores, traballadores e institucións se aúnen para compartir experiencias e trazar as bases para un futuro con moita menos pobreza, que garanta unha vida máis saudable para a poboación costeira, unha educación máis inclusiva e equitativa, maior igualdade, un consumo dos recursos moito máis racional, maior crecemento económico e unha contorna circular e sostible que racionalice a produción, o consumo e as inercias sociais.
