O proxecto propón a creación dun programa de rutas mariñeiras e actividades divulgativas que conectan á cidadanía e visitantes coa realidade da pesca artesanal e o patrimonio mariñeiro da cidade da Coruña. As rutas terán como punto de partida a Lonxa da Coruña, onde as persoas participantes coñecerán de preto o funcionamento da poxa e o percorrido do peixe desde o mar ata os mercados municipais.

Cada ruta inclúe un percorrido a pé polos espazos patrimoniais e arquitectónicos máis emblemáticos da cidade, como A Mariña, os Xardíns de Méndez Núñez ou os mercados históricos de San Agustín, Elviña e Eusebio da Guarda. As visitas, guiadas por persoal especializado, poñen en valor a arquitectura modernista, o consumo responsable, a economía de proximidade e a importancia ambiental do litoral urbano.

No interior dos mercados, promoverase o contacto directo entre participantes e persoas vendedoras das peixarías, resaltando o papel clave do comercio local na cadea de valor do mar. As rutas rematarán cun almorzo degustación de produtos mariños, reforzando a conexión entre cultura, produto e territorio.

Como complemento, levarase a cabo unha exposición itinerante sobre “O papel da muller na actividade pesqueira da Coruña”, que se instalará nos mercados municipais. Esta mostra ten como obxectivo visibilizar o traballo histórico e actual de mulleres como mariscadoras, redeiras, conserveiras ou praceiras.

A proposta integra accións de sensibilización ambiental, posta en valor do patrimonio, dinamización turística e educativa, fomentando a economía azul, o emprendemento e o consumo de proximidade, cun enfoque transversal de igualdade e sostibilidade.