Proxecto promovido polo Concello de Fene e apoiado por diferentes entidades vinculadas co mar que ten como obxecto principal promover e recuperar o patrimonio cultural marítimo-pesqueiro de Fene, neste caso o estaleiro. Sen dúbida ningunha o feito local fenense máis relevante do século XX foi a creación da factoría naval de ASTANO en Perlío en 1941. Orixinariamente, o estaleiro dedicouse á construción de pequenos buques pesqueiros de madeira, facendo do mesmo unha referencia mundial contribuíndo á mellora do sector pesqueiro.

Por tal motivo, o Concello de Fene pon en marcha este proxecto, onde  pretende crear un evento estable que axude a recuperar e aglutinar a historia do mesmo, a través tanto de historiadores, como da historia aínda viva de traballadores tanto en activo como xubilados e das súas familias, con espazos de debate e exposición desa historia, co obxectivo que quede recollida para xeracións futuras. Realizaranse varias accións, dirixidas a empoderar a todas as familias de Fene que teñan relación co estaleiro (que son a grande maioría da poboación), mesturando o que son as relacións posibles coa historia pasada, a través de accións lúdicas co obxecto de crear vínculos entre xeracións e poñer en valor as historias de vida das persoas que foron e son protagonistas da transformación do Concello, debido ao funcionamento do estaleiro.

Levarase a cabo un traslado cronolóxico aos primeiros anos de funcionamento do estaleiro, como se consumía o peixe e marisco nas tabernas polos traballadores, tentando recuperar e volver a introducir especies da ría nos rituais do tapeo de Fene, contando coa colaboración da hostalería local, así como recuperar a canción mariñeira nos bares e tabernas da vila.