• Tras a boa acollida da primeira experiencia, as mariscadoras da Confraría de Lourizán achegarán ás persoas participantes os coñecementos do oficio e a estreita relación entre o marisqueo, os recursos e o coidado da ría

O GALP Ría de Pontevedra organiza este venres, 9 de outubro, unha nova experiencia de turismo mariñeiro para coñecer de preto o marisqueo da man de Victoria López e María Jesús Martínez, mariscadoras da Confraría de Lourizán. A actividade é gratuíta, comezará ás 10:00 horas e terá como punto de encontro o Colexio Sagrado Corazón de Placeres, en Pontevedra. As persoas interesadas poden inscribirse no teléfono 618 320 033.

A proposta dá continuidade á primeira experiencia realizada a pasada semana, no marco do proxecto Mar e Rías Pesca & Turismo, unha iniciativa que busca poñer en valor os coñecementos e as actividades vinculadas ao mar a través dos propios profesionais do sector.

Nesta nova convocatoria, as persoas participantes terán a oportunidade de achegarse directamente ao traballo das mariscadoras, coñecer como se desenvolve unha xornada de marisqueo e descubrir os coñecementos acumulados ao longo de anos de experiencia na ría. Victoria López e María Jesús Martínez serán as encargadas de explicar o seu día a día e os diferentes factores que condicionan o aproveitamento dos recursos marisqueiros. A visita permitirá tamén comprender que detrás da extracción do marisco existe un profundo coñecemento do medio, das mareas e dos ciclos naturais, así como un traballo continuado arredor do coidado e a xestión dos recursos.