A recentemente creada marca “Cofradía de Barallobre” nace co obxectivo de consolidarse como un símbolo representativo do sector da pesca e do marisqueo local, promovendo o seu recoñecemento social e fortalecendo a identidade da confraría.
Este proxecto ten un claro interese colectivo e está deseñado como unha iniciativa de beneficio para todo o sector pesqueiro local, promovendo a pesca artesanal sustentable e visibilizando o traballo das persoas que a integran.
A través de accións educativas e divulgativas, búscase achegar o oficio á sociedade en xeral e especialmente á mocidade, combinando tradición e innovación. Así mesmo, mediante a promoción dos produtos da ría de Ferrol, preténdese reforzar a imaxe da pesca artesanal como actividade económica esencial, moderna e respectuosa co medio ambiente.
O proxecto inclúe a elaboración de material audiovisual con testemuños reais, a instalación de tótems informativos, un vídeo promocional da confraría, e a creación de material gráfico e divulgativo para dar a coñecer as especies locais, as súas temporadas, técnicas de pesca, valor nutricional e consellos de consumo.
Tamén se traballa na posta en valor das artes de pesca tradicionais empregadas pola confraría, destacando o seu carácter sustentable, e na difusión do traballo das persoas mariscadoras e pescadoras que, día a día, manteñen viva esta actividade no Golfo Ártabro.
Así mesmo, recóllese e preserva o patrimonio mariñeiro, recompilando datos históricos e fomentando o orgullo identitario da comunidade, á vez que se impulsa o relevo xeracional e se promove o marisqueo como unha opción laboral digna e con futuro.
Esta iniciativa busca dinamizar a economía local, mellorar o recoñecemento social da actividade marisqueira e fomentar o consumo de produto local, reforzando así o vínculo entre mar, cultura, identidade e territorio.