Posta en valor do patrimonio material e inmaterial relacionado coa cultura mariñeira de Ferrol, en particular do barrio portuario de Ferrol Vello, declarado como Ben de Interese Cultural (BIC), conxunto patrimonial ao que se pretende dotar de contido a través deste proxecto con iniciativas diversas para reforzar a imaxe da zona como referente da cultura mariñeira. Favorecer a conexión da poboación co mundo do mar e coas súas tradicións culturais, dinámica e idiosincrasia adaptándoas a diferentes colectivos e apostando pola colaboración entre as entidades vinculadas ao mar e ao propio barrio. Especial protagonismo cobra neste sentido a Confraría de Pescadores e Mariscadores de Ferrol, entidade á que este proxecto apoia para incrementar o valor do seu papel sociocultural, instalacións, produtos e imaxe.

Poñer en común o traballo que realizan os diferentes colectivos vinculados ao sector pesqueiro e marítimo da zona de Ferrol Vello, sumando sinerxias entre estas entidades co propósito de que o proxecto canalice e contribúa a reforzar a imaxe da zona como referente da cultura mariñeira. Valorizar tamén a importante industria -ligada ao mar na maioría dos casos- que existiu na zona no século XX (bacaladeira Pysbe ou a fábrica de xeo, entre outros...).

A orixe mariñeira do barrio é o elemento central do proxecto, e arredor del xira o conxunto de actividades propostas co obxecto de poñer en valor esta característica destacada de Ferrol Vello e a importancia de manter a conexión do barrio coa actividade do sector. Favorecer o coñecemento dos produtos que se obteñen da ría de Ferrol, tanto entre a poboación en xeral como entre os máis novos, e atraer visitantes ao barrio para promocionalo dende o punto de vista turístico como orixe mariñeiro da cidade, son os dous piares deste proxecto que amarra definitivamente a Ferrol Vello co mar.

O Concello de Ferrol, conta para levar a cabo este proxecto, coa colaboración da Confraría de Pescadores de Ferrol, a Autoridade Portuaria de Ferrol, a Asociación Hostalería Fervello, a AVV Ferrol Vello e a Escola Náutico Pesqueira.