Da formación á posta en marcha dunha experiencia propia. Silvia Coba estreou en Mugardos “Sente o Mar”, unha proposta de turismo mariñeiro creada para achegar ás persoas participantes ao marisqueo a pé e dar a coñecer un oficio, os seus saberes e a súa relación coa ría.

A primeira actividade, celebrada o 15 de setembro no Areal do Peirao de Mugardos, permitiu coñecer de preto como se desenvolve o marisqueo a pé, as especies da ría e o percorrido que segue o marisco ata chegar ao punto de control da confraría.

A convocatoria, inicialmente prevista para 12 persoas, reuniu finalmente a 18 participantes, procedentes de Mugardos, Ferrol e A Coruña, entre outros lugares. Silvia foi a encargada de guiar esta primeira experiencia, trasladando ás persoas asistentes os seus coñecementos como profesional do sector.

Da formación á experiencia

“Sente o Mar” xorde do traballo desenvolvido no marco de “Mar e Rías: Pesca & Turismo”, proxecto de cooperación no que participa o GALP Golfo Ártabro Norte xunto cos demais GALP de Galicia. O proxecto está coordinado polo GALP Ría de Pontevedra e ten entre os seus obxectivos formar profesionais do sector pesqueiro en actividades turísticas vinculadas á súa experiencia e aos seus coñecementos.

Tras participar na formación e coñecer outras experiencias desenvolvidas en Galicia, Silvia dá agora o paso de levar o aprendido ao seu propio territorio a través dunha proposta vinculada ao marisqueo, á ría e á cultura mariñeira de Mugardos.

A posta en marcha de experiencias coma esta permite avanzar na valorización do patrimonio marítimo-pesqueiro e dos coñecementos tradicionais, ao tempo que explora novas posibilidades de diversificación da actividade para as persoas profesionais do mar. Estes son precisamente algúns dos obxectivos de Mar e Rías: Pesca & Turismo.

Tras esta primeira xornada, “Sente o Mar” continuará ofrecéndose a grupos interesados en achegarse ao marisqueo a pé e coñecer a realidade deste oficio en Mugardos.