O Club de Vela Alamar, fundado en 2016, conta actualmente con 53 socios
permanentes e preto de 400 participantes nos cursos de verán. Co obxectivo de
mellorar as instalacións e optimizar as actividades, propóñese a adquisición dunha
carpa multiusos de 7 x 12 m e altura de 6 m. Este espazo permitirá desenvolver
talleres, almacenar embarcacións e material, así como acoller clases, charlas,
regatas e outros eventos, adaptándose ás necesidades segundo a época do ano.
O proxecto busca mellorar a calidade das instalacións e a imaxe do club, ampliar a
oferta de actividades e favorecer a educación en valores como a cooperación, o
esforzo, o compañeirismo e o respecto polo medio ambiente. Ademais, contribúe á
promoción do turismo náutico, á posta en valor da Ría de Betanzos e do patrimonio
mariñeiro, e á integración social mediante programas para nenos e nenas de familias
en situación de vulnerabilidade ou exclusión.
A carpa permitirá que os socios, rapaces, turistas e visitantes poidan gozar de
actividades náuticas nun espazo seguro, funcional e polivalente, fomentando o
contacto co mar, o coñecemento da cultura local e a sustentabilidade. En conxunto,
esta iniciativa reforza a capacidade operativa do club, mellora a experiencia dos
usuarios e promove a educación, a inclusión e a diversificación turística na comarca
do Golfo Ártabro Sur.