O proxecto “Navegando cara a unha tradición sostible” busca fortalecer o sector
pesqueiro artesanal da Confraría de Pescadores de Sada mediante a modernización
tecnolóxica, a eficiencia enerxética, a valorización do produto local e a promoción da
identidade mariñeira. A iniciativa estrutúrase en catro liñas principais: a instalación
dun mando inalámbrico para a grúa da nave de redes, garantindo maior seguridade
laboral; a creación dunha illa enerxética nos viveiros de marisco para manter a
continuidade operativa e a calidade do produto; o desenvolvemento dun proxecto
piloto de produtos de 4ª e 5ª gama para xerar valor engadido e diversificar a
comercialización; e accións de divulgación que promovan o consumo de peixe de
proximidade, o papel da muller e a tradición mariñeira de Sada.
O proxecto aspira a reducir riscos laborais, garantir a resiliencia enerxética,
incrementar a eficiencia e sustentabilidade, aumentar a trazabilidade e a confianza
do consumidor, diversificar as fontes de ingresos dos pescadores e pór en valor o
patrimonio material e inmaterial vinculado ao mar.