O proxecto MARZERO ten como finalidade a protección do medio ambiente acuático mediante a
promoción de prácticas sostibles no sector pesqueiro e a redución dos residuos de plástico e cartón que
chegan ao mar no ámbito do GALP Golfo Ártabro Sur. Para a súa execución, establécense colaboracións
coas Confrarías do territorio, especialmente as da Coruña e Sada, así como con empresas do sector,
outras entidades interesadas e administracións locais, co obxectivo de impulsar unha xestión máis
responsable dos residuos xerados.
O proxecto céntrase na recollida, clasificación, selección, compactación e posterior envío a empresas
reutilizadoras dos residuos plásticos e de cartón procedentes das actividades pesqueiras e doutras
actividades económicas, fomentando a súa redución en orixe e evitando que estes acaben no medio
mariño por unha xestión inadecuada. Para iso, prevese a ampliación das instalacións da empresa
promotora dedicadas á xestión e tratamento destes residuos, co fin de dar servizo ás entidades do
territorio e mellorar a capacidade operativa.
A ampliación das instalacións incorporarase criterios de eficiencia enerxética, como o uso de iluminación
LED e unha mellor organización dos espazos, permitindo optimizar os procesos de clasificación e
aumentar a capacidade de tratamento, ao tempo que se reducen os rexeitamentos e se amplía a
tipoloxía de plásticos recuperados. A proximidade aos portos e polígonos industriais do ámbito de
actuación contribuirá tamén á redución da pegada de carbono asociada ao transporte.
Esta actuación favorecerá unha maior dispoñibilidade de materiais reciclados para as empresas
reutilizadoras, impulsando a economía circular no territorio e facilitando a creación de novos produtos
vinculados ao sector pesqueiro. Ao mesmo tempo, permitirá incrementar a produción da empresa,
mellorar a súa eficiencia, xerar novas oportunidades laborais, consolidar o emprego existente,
especialmente o feminino, e reforzar a sustentabilidade global da actividade.
En conxunto, o proxecto contribúe á conservación do medio natural costeiro, ao fortalecemento dun
sector pesqueiro máis resiliente e sostible e á redución efectiva do impacto ambiental dos residuos nas
zonas portuarias e litorais do GALP Golfo Ártabro Sur.