1. Adquisición dunha embarcación adaptada da modalidade 2x/2- (PR).A incorporación desta embarcación permitirá ampliar a capacidade operativa da entidade para desenvolver actividades inclusivas no ámbito do remo adaptado, facilitando a participación de persoas con discapacidade física na práctica náutico-deportiva e garantindo a dispoñibilidade dun recurso estable para o desenvolvemento das accións previstas.

2. Desenvolvemento de actuacións específicas de inclusión social. Durante o período de execución do proxecto levaranse a cabo actividades de iniciación e aproximación ao remo dirixidas a persoas con discapacidade física, en colaboración con entidades sociais do territorio, favorecendo a súa integración na práctica deportiva e no medio mariño como espazo de participación e convivencia.

3. Accións de divulgación da actividade náutico-deportiva e da cultura mariñeira. Realizaranse visitas a centros educativos do municipio nas que se explicará o arraigo mariñeiro do remo, a súa evolución histórica e a súa dimensión social, combinadas con demostracións prácticas vinculadas á actividade náutica co fin de achegar esta práctica á mocidade.

4. Implantación dun decálogo interno de boas prácticas ambientais. Elaborarase e aprobarase un documento interno que recolla medidas orientadas á redución de residuos, ao uso responsable do medio mariño e á concienciación ambiental das persoas usuarias da entidade. A súa implantación complementarase cunha sesión formativa dirixida ás persoas socias e participantes nas actividades do club.

5. Implantación dunha ferramenta de xestión dixital. Procederase á adquisición e posta en funcionamento dun software de xestión que permita optimizar os procesos administrativos, económicos e organizativos da entidade, mellorando a coordinación das actividades e reforzando a sustentabilidade interna do proxecto