Dentro do proxecto Pesca Saúde realizaranse sete demostracións de cociña en vivo en prazas de abastos, mercados e locais de asociacións de sete vilas galegas durante o mes de xullo. Estas sesións de ‘showcooking’, que terán como protagonistas o peixe e outros produtos do mar, celebraranse a partir das 11:30 h e estarán conducidas por cociñeiros e cociñeiras de prestixio que preparán en vivo diferentes receitas que poderán degustar as persoas asistentes.
As citas son o martes 7 de xullo, en Sada, na Casa da Cultura «Pintor Lloréns» coa restauradora de A Artesa da Moza Crecha. O mércores 8, na Praza de abastos da Guarda, coa responsable da cociña do restaurante O Cangrexal. O xoves 9 haberá dupla demostración: no Mercado Municipal de Carballo con Miguel Silvarredonda, e na Praza de abastos de Noia cos cociñeiros de A Casa do Tello e Rosalía. O martes 14, na Praza de abastos de Vilagarcía será o cociñeiro Miguel Mosteiro quen elaborará as súas receitas en vivo. Membros da Escola de cociña «Cousiñas» farán unha demostración o mércores 15 na Praza de abastos de Bueu. Ana Martínez Arruñada, da Escola de Hostalería IES de Foz porá o ramo á programación de ‘showcooking’, o xoves 16, en Viveiro, no local da Asociación Recreativa Cultural O Valado.
As persoas que o desexen poden reservar a súa praza en i.gal/showcooking. Durante estes eventos celebraranse tamén os sorteos de degustacións de produto pesqueiro, entre as persoas que participaran na campaña reunindo os seus tiquets de compra e depositándoos nos buzóns de Pesca Saúde.
Ademais, as peixerías seguen a ter un papel protagonista en Pesca Saúde. Máis dun cento de puntos de venda adheridos á campaña e repartidos por toda a costa galega, aceptarán os vales de desconto de 5€, aplicables directamente na compra, que se reparten entre os asistentes nestes eventos. Ademais, amplían o seu prazo de validez ata o vindeiro 31 de xullo.
Outras actividades: Come o mar, come saúde
Outro obxectivo do proxecto é o sector da hostalaría, onde coa iniciativa Come o mar, come saúde xa se está a traballar cos restaurantes adheridos na elaboración de menús saudables sempre con produtos pesqueiros locais e de tempada.
E a partir de setembro, poranse en marcha os Obradoiros de Batchcooking. 2/2 O Batchcooking é un xeito de organizar a cociña da semana consistente en preparar nun mesmo momento varias elaboracións ou bases que despois se poden combinar e reutilizar en diferentes comidas. Os obradoiros acompáñanse da publicación dun receitario, que se reparte nos eventos de Pesca Saúde e tamén está dispoñible na web do proxecto.
Os beneficios do consumo de produto pesqueiro na saúde
O proxecto Pesca Saúde nace nun contexto no que o consumo de peixe fresco descendeu progresivamente mentres aumentou a presenza de produtos ultraprocesados na alimentación habitual. Esta transformación dos patróns dietéticos está asociada a un incremento das enfermidades cardiovasculares, metabólicas e inflamatorias.
Por iso, promover o consumo regular de peixe galego non é só unha decisión dietética, senón tamén unha estratexia de saúde pública baseada na evidencia científica.
A través destas actividades, búscase fomentar o consumo de produtos pesqueiros para mellorar a saúde e o benestar da cidadanía, promovendo hábitos de vida saudables.
O peixe e o marisco son alimentos de alta densidade nutricional: conteñen moitos nutrientes esenciais en proporcións axeitadas e con poucas calorías. Proporcionan proteínas de alto valor biolóxico, con todos os aminoácidos esenciais, e graxas cardiosaudables, ricas en ácidos graxos omega-3 (EPA e DHA), que o corpo non pode fabricar por si mesmo. Está probado o seu beneficio no sistema cardiovascular, na saúde cerebral e función cognitiva, na saúde ósea e muscular, na inmunidade e no metabolismo.
Quen somos?
En Pesca Saúde, financiada polo Fondo Europeo Marítimo, de Pesca e de Acuicultura (FEMPA) 2021-2027 a través da Consellería do Mar, participan 7 GALP, que cobren unha parte importante do litoral galego: GALP Ría de Vigo-A Guarda, Ría de Pontevedra, Ría de Arousa, Costa Sostible, Costa da Morte, Golfo Ártabro Sur e A Mariña-Ortegal.
O proxecto conta tamén coa colaboración da Consellería de Sanidade, unindo as Estratexias de Desenvolvemento Local Participativo (EDLP) coa Estratexia Galega de Saúde Comunitaria 2023-2027.