O proxecto “Mar de Sorrizo” ten como finalidade recuperar, conservar e poñer en valor o patrimonio mariñeiro do Concello de Arteixo, tanto material coma inmaterial, a través de accións que combinen divulgación, formación e dinamización social. O eixo do proxecto será o centro de interpretación situado na antiga nave de Sorrizo, recentemente rehabilitada, que actuará como espazo vivo para a transmisión de saberes, oficios e tradicións ligadas ao mar.

A iniciativa desenvolverase ao longo de tres anualidades (2025-2027) e incluirá actuacións como a construción dunha réplica dunha chalana —embarcación tradicional con forte presenza histórica na zona—, a restauración de artes de pesca tradicionais, e a posta en marcha de talleres participativos dirixidos a diversos públicos. Tamén se crearán contidos didácticos adaptados, materiais divulgativos e accións de comunicación que reforcen a identidade mariñeira e a importancia da sustentabilidade ambiental.

Especial atención prestarase á visibilización do papel das mulleres no mundo do mar, integrando esta perspectiva en todas as actividades do proxecto, co obxectivo de fomentar a igualdade e dar voz á historia silenciada de moitas profesionais do sector pesqueiro.

“Mar de Sorrizo” nace como unha proposta aberta á comunidade, que busca fortalecer o vínculo entre a cidadanía e o seu entorno mariño, revitalizando a cultura local e dinamizando o territorio a través do patrimonio marítimo e da súa dimensión educativa, social e turística.