O proxecto “Monitoreo de especies clave no Golfo Ártabro Sur” busca mellorar o
coñecemento sobre a conservación, distribución e interaccións de especies mariñas e
costeiras de interese ecolóxico e pesqueiro, ao tempo que fomenta a implicación da
comunidade local na vixilancia e coidado do medio litoral. Realízase o seguimento de
Atrina fragilis, de fauna indicadora das praias, de cetáceos en interacción coa frota
pesqueira, e de nudibranquios e invertebrados exóticos invasores, combinando
traballo de campo, enquisas, prospeccións submariñas e recompilación de
información histórica.
O proxecto tamén promove a creación de grupos locais de “vixías do litoral”,
formados por veciñanza, pescadores e clubs de mergullo, que reciben formación
teórica e práctica para participar activamente no seguimento de especies, hábitats e
impactos ambientais, fortalecendo a ciencia cidadá, a sensibilización ambiental e a
gobernanza participativa do territorio. De maneira transversal, realízanse tarefas de
recompilación bibliográfica, elaboración de protocolos, cartografía, procesado e
análise de datos, redacción de informes e accións de divulgación para garantir a
difusión dos resultados á comunidade local e científica.
Os beneficiarios do proxecto inclúen o sector pesqueiro e marisqueiro, a veciñanza
dos concellos do GALP, administracións locais, comunidade científica e educativa,
clubs de mergullo e colectivos ambientais, así como toda a poboación do territorio
de forma indirecta. Espérase xerar unha base de coñecemento actualizada sobre
especies clave, mellorar a xestión sostible dos recursos mariños, reforzar a
participación cidadá e consolidar ferramentas útiles para a conservación ambiental,
a resiliencia económica e o desenvolvemento sostible do Golfo Ártabro Sur.