O proxecto consiste na incorporación dun condensador evaporativo móbil de alta eficiencia enerxética co obxectivo de mellorar o rendemento do sistema de produción de frío e xeo nas instalacións da Lonxa da Coruña. Este novo equipamento permitirá dar servizo a diferentes áreas de actividade da lonxa, contribuíndo á conservación óptima dos produtos pesqueiros e reducindo significativamente o consumo eléctrico.

A intervención incide directamente na mellora da eficiencia enerxética global das instalacións e na modernización dos sistemas técnicos empregados para garantir a calidade e trazabilidade dos produtos do mar. Ademais, o proxecto inclúe accións complementarias de sensibilización ambiental, mediante a participación en eventos, congresos e conferencias, co fin de fomentar a implantación de boas prácticas que contribúan a mitigar o cambio climático no sector pesqueiro.

Esta mellora técnica permitirá reducir a xeración de residuos plásticos e envases derivados de procesos de conservación alternativos, promovendo o uso do xeo como medio natural de conservación. Tamén terá un impacto positivo sobre as condicións laborais do persoal da lonxa, reforzando a súa seguridade e benestar, especialmente no caso das mulleres, que representan unha parte destacada do colectivo profesional presente nas instalacións.