O proxecto permitirá desenvolver xornadas de iniciación ao remo tradicional dirixidas especialmente á mocidade e á poboación escolar, nas que se abordarán tamén a historia do remo, a súa relación cos oficios do mar, os valores de cooperación e as nocións básicas de seguridade marítima.

Complementariamente, organizaranse actividades de divulgación sobre a cultura marítima e a historia local, contando coa colaboración de representantes das confrarías de pescadores para dar a coñecer a pesca artesanal, o marisqueo e os produtos pesqueiros do territorio. A trainera será empregada como recurso para explicar a relación histórica entre as persoas e o medio mariño e para achegar á cidadanía ás formas tradicionais de navegación.

Tamén se desenvolverán accións de sensibilización ambiental, incluíndo charlas sobre sustentabilidade mariña, residuos, uso responsable da enerxía e mobilidade sostible, así como accións simbólicas de recollida de residuos mariños. Estas actividades permitirán vincular a práctica do remo co coidado e respecto polo medio mariño.

O proxecto incorporará ademais actividades específicas para favorecer a igualdade e a inclusión, con iniciativas destinadas a incrementar a participación das mulleres e a eliminar barreiras de acceso ás actividades marítimas. A isto sumaranse adestramentos de remo tradicional, participación en regatas e encontros de embarcacións tradicionais e un programa de fomento do remo base e da incorporación de novos deportistas.

Finalmente, a iniciativa contará con accións de comunicación e visibilidade mediante a identificación da trainera, a difusión do proxecto na web e nas canles dixitais do club e a participación en eventos culturais e festividades relacionadas co mar.