Este proxecto, promovido conxuntamente polas Confrarías de Pescadores de Barallobre e Pontedeume, ten como obxectivo principal revalorizar a ostra rizada (gassostrea gigas), un recurso mariño que ata hai pouco era considerado unha especie invasora e de escaso valor comercial no Golfo Ártabro.
A iniciativa busca promover o seu aproveitamento gastronómico a través da transformación artesanal do produto, experimentando con diferentes formatos de consumo: tanto en fresco como en conserva. Mediante unha metodoloxía de proba e mellora, o proxecto permitirá testar novas formas de preparación, coa finalidade de crear conservas de calidade e alto valor engadido, sempre dentro da normativa da artesanía alimentaria galega.
Ao longo do proceso desenvolveranse accións formativas, sesións demostrativas e presentacións públicas, implicando activamente ás confrarías e á comunidade. O obxectivo último é xerar novas oportunidades económicas no sector, apostar pola innovación sostible e converter a ostra rizada nun símbolo de aproveitamento responsable e identidade local.
Máis alá do valor económico, o proxecto ten un claro impacto colectivo: fortalece a identidade mariñeira da zona, abre novas posibilidades de aproveitamento sustentable do medio mariño e sitúa ás confrarías participantes como axentes activos na dinamización do seu territorio. Con esta proposta, a ostra rizada deixa de ser vista como un problema para converterse nun símbolo de oportunidade.