Feito co Mar – Transformación e valorización do produto pesqueiro é un proxecto de cooperación coordinado polo GALP Golfo Ártabro Norte, no que participan sete Grupos de Acción Local do Sector Pesqueiro de Galicia: GALP Golfo Ártabro Norte, GALP Golfo Ártabro Sur, GALP A Mariña-Ortegal, GALP Costa da Morte, GALP Costa Sostible, GALP Ría de Arousa e GALP Ría de Pontevedra. 

O proxecto ten como finalidade impulsar a transformación e valorización do produto pesqueiro local e fomentar o emprendemento, promovendo novas elaboracións de peixes e mariscos, con especial atención ás prácticas artesanais, como conservas, salgados, afumados, adubados, desecados, patés ou pratos elaborados.    

Un dos seus principais eixos será a posta en marcha dos Viveiros Formativos de Emprendemento, que en 2027 contarán con dous programas, un de iniciación e outro de profesionalización, orientados á formación práctica, á experimentación e ao acompañamento de proxectos de emprendemento e innovación. A formación abordará aspectos como a normativa, as boas prácticas, as técnicas e procesos de elaboración, o envasado e a etiquetaxe, e completarase cun proceso de titorización para aquelas persoas e colectivos que queiran avanzar na posta en marcha dunha iniciativa empresarial.   

O proxecto contempla tamén o traballo cos concellos para identificar e impulsar Espazos de Traballo Colaborativo destinados á transformación de produto pesqueiro e a creación dunha futura rede que conecte estes espazos nos territorios dos GALP participantes.    

Feito co Mar diríxese principalmente ao sector pesqueiro, marisqueiro e acuícola, aínda que as súas actuacións tamén poderán beneficiar a outros colectivos vinculados á formación e ao emprendemento, contribuíndo á creación de novas iniciativas económicas, á valorización dos produtos do mar e á remuda xeracional no sector.