As redeiras son parte fundamental do desenvolvemento local e económico da Guarda. No 2005 constitúese a Asociación de redeiras Atalaia, articulándose como grupo de traballo e conseguindo, xunto a compañeiras doutros territorios, avances nos dereitos laborais deste colectivo conformado por mulleres e con especial relevancia en Galicia.

A asociación está formada por un grupo de mulleres dinámico e aberto a novas áreas de traballo, entre as que destacan a reciclaxe dos materiais dos aparellos, a elaboración de pezas de artesanía, e a divulgación do oficio en charlas e formacións. Esta diversificación fortalece a nosa estabilidade económica, o que propiciou a entrada de novas socias de maneira recente, fortalecendo o relevo xeracional deste oficio. Así mesmo, participamos dun tecido asociativo amplo (sector pesqueiro, ámbito público, asociacionismo de mulleres...).

Tras vinte anos de traxectoria, a Asociación quere por en valor o seu traballo, que conforma unha parte da historia mariñeira da vila da Guarda. Isto lévase a cabo mediante un programa formativo que abarca a construción do seu propio relato, a planificación estratéxica cara a superar os retos aos que se enfrentan, o reforzo das habilidades asociativas, tecnolóxicas e de comunicación, e unha introdución ao mundo do cooperativismo.

O proxecto busca facer visible este proceso, enfocándoo cara a transmisión ao público xeral e dando forma a un xérmolo de visitas de turismo mariñeiro. Para iso, créase unha web que aumente a visibilidade social das redeiras e do seu oficio.

Preparación dun espazo expositivo que recolle os obxectos tradicionais pertencentes ás persoas xubiladas do mar, e uns paneis informativos sobre o sector pesqueiro. Este espazo expositivo instálase no balcón con vistas á nave, ao que se accede dende unha sala en desuso a adaptar. Esta sala emprégase tamén para desenvolver as reunións internas e para acoller visitas. Ademáis, o mobiliario da sala elabórase con materiais reciclados, poñendo en valor a sostibilidade e a artesanía.

Atadeiras responde a algunhas das necesidades identificadas na EDLP: valorizar o patrimonio cultural como elemento vertebrador mediante a súa difusión e conservación, reforzar os liderados das mulleres no territorio, ou desenvolver o turismo costeiro sostible e desestacionalizado. Atadeiras, ademais, fortalecerá o proceso de relevo xeracional no que se atopa o colectivo das redeiras: un proceso no que recoñecer o pasado e proxectarnos ao futuro. Atadeiras fortalecerá a capacidade de soster a nosa actividade, e tamén abrirnos portas a valorar desenvolver, no futuro, actividades de diversificación como o turismo mariñeiro, sendo A Guarda un lugar estratéxico por ser o punto de entrada en Galicia do Camiño Portugués da Costa.

O proxecto amosa a importancia de compartir coa poboación local e visitante a historia da asociación, que tamén é historia local e do conxunto do sector da pesca en Galicia. Por iso, buscase fortalecer os lazos do tecido comunitario facendo partícipes ao ámbito público (Concello, colexios) e asociativo da zona (sector pesqueiro e entidades de inclusión social), así como doutros ámbitos como o museístico.

Entre as necesidades identificadas na EDLP, Atadeiras responde á de reforzar os liderados das mulleres no territorio, valorizar o patrimonio cultural como elemento vertebrador mediante a súa difusión e conservación, ou á de desenvolver un turismo costeiro sostible e desestacionalizado.