Este proxecto, promovido polo Concello de Cabanas, ten como obxectivo consolidar a zona litoral como un destino turístico de interese, apostando por un modelo sostible, inclusivo e participativo.
A iniciativa ten como centro de referencia o CIMM Cabanas, que se configura como punto de encontro para actividades formativas, interpretativas e de divulgación arredor do patrimonio mariñeiro, natural e pesqueiro.
O Concello de Cabanas promove unha iniciativa de aprendizaxe permanente orientada a poñer en valor o litoral e o seu patrimonio mariñeiro, combinando accións de carácter turístico, educativo e social. O proxecto ten como eixo central o CIMM Cabanas, que se reforza como espazo de referencia para o desenvolvemento de actividades e punto de encontro para o público xeral e axentes do territorio.
A través de rutas interpretativas polo litoral, tanto a pé como a bordo da embarcación Anduriño, explorarase a riqueza ambiental, cultural e pesqueira da zona, con apoio de especialistas en turismo científico, oceanografía e patrimonio mariñeiro.
O proxecto aposta por unha visión inclusiva e accesible, coa implantación de sinalizacións con pictogramas no CIMM, e a participación activa de entidades sociais que traballan con persoas con diversidade funcional. A accesibilidade é un eixe clave da proposta, entendida como garantía de inclusión e participación de toda a cidadanía.
Tamén se desenvolverán autoguías dixitais, dispoñibles a través de dispositivos móbiles, cunha ampla variedade de contidos sobre biodiversidade, espazos naturais como as Fragas do Eume, flora e fauna costeira e produtos pesqueiros locais.
Este proxecto destaca pola colaboración directa co sector pesqueiro, especialmente coas Confrarías de Pescadores de Pontedeume e Barallobre, que se implican na difusión e desenvolvemento das actividades, e contribuirán a dar a coñecer os oficios do mar e os produtos da ría.
O proxecto está deseñado co obxectivo de beneficiar ao conxunto da poboación, prestando especial atención a colectivos específicos como as persoas con discapacidade, o sector pesqueiro, e as mulleres do mar, promovendo a súa implicación activa nas accións propostas e recoñecendo o seu valor no desenvolvemento local.