O proxecto contempla a creación de cinco espazos temáticos na parte superior da Lonxa de Fisterra, destinados a poñer en valor a identidade mariñeira, a actividade pesqueira e o patrimonio marítimo da localidade.

As actuacións inclúen unha exposición fotográfica sobre o Fisterra mariñeiro de antaño, unha área dedicada á pesca costeira artesanal e ás artes de pesca tradicionais, con especial protagonismo do polbo, e un espazo sobre os principais produtos do marisqueo local, como o longueirón, o percebe e o ourizo. Tamén se habilitará unha sala dedicada ao Prestige, con proxección dun documental baseado en testemuños de persoas da vila e pescadores da confraría, incorporando unha dimensión de sensibilización sobre a sustentabilidade do medio mariño. Finalmente, crearase un espazo dedicado aos naufraxios acontecidos nas augas de Fisterra, incluíndo unha homenaxe aos socios da confraría falecidos.

En conxunto, estas actuacións buscan ofrecer unha visita máis completa, atractiva e didáctica, contribuíndo á divulgación da cultura e da memoria mariñeira de Fisterra tanto entre os visitantes como entre a poboación local e, especialmente, entre o público escolar.