A Confraría de Pescadores de Ferrol continúa apostando pola comercialización directa a través da súa peixería “A Túa Lonxa”, como vía para garantir ingresos sostibles tanto para a entidade como para os seus asociados, especialmente nun contexto de baixa produtividade na Ría de Ferrol.
Con este proxecto, a Confraría impulsa a marca “Cofradía de Ferrol” mediante o desenvolvemento dunha campaña de comunicación dixital de 18 meses, cunha forte presenza en redes sociais e a creación dunha páxina web profesional. Esta web estará enfocada na actividade da lonxa e incluirá un sistema de venda online de peixe e marisco fresco, facilitando o acceso directo ao consumidor e fomentando o comercio de proximidade.
Ademais, o proxecto contempla a instalación dun acuario didáctico e expositivo, que servirá como ferramenta educativa para promover o consumo responsable, a sustentabilidade dos recursos mariños e a reciclaxe, dirixido a público infantil, xuvenil e adulto.
Trátase dun proxecto de interese e beneficio colectivo, xa que repercute directamente en todos os socios e socias da Confraría, mellorando as súas condicións laborais e incrementando o valor engadido do produto que capturan. Contribúe á promoción da pesca costeira artesanal, á dinamización do tecido económico local e á defensa do patrimonio marítimo da Ría de Ferrol.
Esta iniciativa contribúe á profesionalización do sector, mellora a imaxe da Confraría, reforza a marca local, facilita a conciliación da vida laboral e familiar, e promove a sustentabilidade ambiental e social do sector pesqueiro tradicional.