O presente proxecto vén a continuar e mellorar o traballo que estamos a facer durante o desenvolvemento do Proxecto relacionado coa gobernanza denominado “Somos Confraría”, que tamén é financiado polo Galp Ría de Vigo- A Guarda. Entendemos que a Nova Lonxa de Canido é o vínculo de unión entre os dous proxectos, e unha das liñas de vertebración da actividade económica da Confraría de Vigo nos vindeiros anos. Unha oportunidade de comercialización dos produtos pesqueiros dos nosos socios e socias que se verá reforzado polas seguintes accións incluídas no presente proxecto: 1. Acondicionamento de zona de produtos pesqueiros da Lonxa: trátase da compra dunhas mesas de inox adecuadas para o traballo e manipulación dos produtos do mar pescados polos nosos socios e socias, así como para a exposición de peixes e mariscos para a súa poxa e/ou venda directa. 2. Acondicionamento da oficina de traballo da Lonxa: trátase de fornecer a oficina da nova Lonxa de Canido das ferramentas necesarias para dar servizo aos nosos socios e socias e traballar na mellora da comercialización dos produtos pesqueiros. Ademais incluímos un control de acceso con tarxeta á instalación para facilitar a entrada dos socios e socias que utilicen a os baños para cambiarse tras o traballo no mar e gardar a súa roupa de mergullo, principalmente. 3. Mellora da distribución e venda de produtos pesqueiros: Para poder facer unha mellor comercialización e distribución dos produtos pesqueiros dos nosos socios e socias, será preciso ter unha furgoneta con isotermo, que sexa segura e permita trasladar os produtos tanto ao Porto Pesqueiro de Vigo como a compradores do sector da restauración.