O proxecto Salinas do Ulló aséntase na necesidade da transferencia de coñecementos para desenvolvemento de estratexias innovadoras de promoción e posta en valor da Paisaxe do Sal de Vilaboa co fin de crear un recurso patrimonial, cultural e social sustentable que promove un turismo de calidade ao tempo que respecta e potencia os valores identitarios dunha comunidade local vencellada ao mar. O proxecto para a transmisión da Paisaxe do Sal de Vilaboa, entendida como unha Paisaxe Cultural resultado da interacción humana e o medio, require da colaboración de institucións científicas con experiencia acreditada para a transferencia de coñecementos e estratexias que permitan a potenciación das salinas como recurso eficiente e con valor engadido. Neste senso, a base temática do proxecto Salinas do Ulló radica na imbricación directa da dimensión histórica e cultural da explotación e uso do das salinas durante a Época Moderna co seu entorno ambiental e a correcta divulgación do recurso creado a través dun método divulgativo eficaz. No contexto de crise global causada pola COVID-19, o proxecto Salinas do Ulló busca crear un recurso turístico adaptado á situación derivada da pandemia, facendo proveito dun turismo de aire libre capaz de impulsar o desenvolvemento económico e diversificación sectorial. A promoción dos espazos patrimoniais abertos será clave nas novas propostas de potenciación turística no contexto postpandémico de reconstrución económica.