O proxecto céntrase na construción dun Centro de Interpretación da Cultura Tradicional Mariñeira, que acollerá a lancha xeiteira "Canle", unha embarcación tradicional construída integramente en madeira, garantindo a súa conservación e mantendo vivo o patrimonio marítimo da parroquia de Lira.

O edificio funcionará como un espazo de divulgación da cultura mariñeira e marítima, acollendo exposicións, conferencias, presentacións literarias e audiovisuais, así como eventos de promoción dos produtos do mar da contorna. O obxectivo é poñer en valor as tradicións mariñeiras e fomentar o coñecemento sobre o mar.

Ademais, será un lugar aberto á innovación e á colaboración, permitindo o desenvolvemento de proxectos vinculados ao ámbito mariño, preservando tanto o legado material como inmaterial asociado á xeiteira e á cultura mariñeira local. Deste xeito, xeraranse novas oportunidades de formación, divulgación e cohesión social, fortalecendo o tecido asociativo e comunitario da contorna

A cultura marítima forma parte integral da comunidade parroquial de Lira e da súa comarca. Hai vinte anos, a Asociación Cultural Canle iniciou a construción dunha réplica das lanchas xeiteiras, embarcacións tradicionais da zona, coa axuda da Consellería do Mar. Desde entón, a embarcación Canle participa en actividades de iniciación á navegación tradicional a vela e nos Encontros de Embarcacións Tradicionais organizados por Culturmar ao longo da costa galega.

A embarcación, construída integramente en madeira, require mantemento continuo, que se realizará no interior do futuro Centro de Interpretación. Estas tarefas serán visitables e acompañadas de actividades explicativas, reforzando a implicación da comunidade e ofrecendo un enfoque innovador de divulgación do patrimonio marítimo.

O Centro contará cunha exposición permanente de fotografías do litoral, embarcacións e profesionais da pesca local, así como outros bens materiais e inmateriales relacionados coa cultura mariñeira de Lira. Ademais, acollerá exposicións itinerantes e actividades culturais abertas ao público, fomentando a cohesión social e a participación activa da comunidade, ao tempo que transmite o valor do patrimonio marítimo a veciños e visitantes.