O sector pesqueiro en Muros está a sufrir os efectos do cambio climático, que afecta os recursos marisqueiros e obriga a reducir cotas e ampliar os períodos de veda para garantir unha explotación sostible e a supervivencia do sector. Esta diminución da actividade extractiva leva a unha baixada dos ingresos e emprego, polo que é prioritario buscar solucións que eviten prexuízos económicos na rexión.

Paralelamente, o crecente interese do turismo en experiencias auténticas relacionadas co mar impulsa un novo modelo turístico que valoriza a observación e comprensión das actividades pesqueiras e o patrimonio local.

Este proxecto busca diversificar o sector coa posta en marcha de tres propostas divulgativas sobre o marisqueo a pé, co fin de sensibilizar os visitantes sobre a importancia e sustentabilidade do marisqueo tradicional e poñer en valor os produtos do mar.

A diversificación tamén apostará polo turismo para ofrecer ás persoas traballadoras novas fontes de ingresos mediante rutas guiadas, obradoiros interactivos e visitas escolares. O programa inclúe capacitación en pescaturismo para o marisqueo a flote e ferramentas para que as mariscadoras a pé xestionen estas iniciativas, mellorando a súa competitividade e adaptándose ao mercado turístico sen perder a súa actividade tradicional.

Deste xeito, a diversificación turística reducirá a presión sobre os bancos marisqueiros, ofrecerá unha vía alternativa de traballo e mellorará a calidade de vida das familias marisqueiras ao longo do ano, sen depender só das tempadas extractivas.