O principal obxectivo do proxecto "400 anos do Estanque da Seca" é sentar as bases para conxugar un servizo público vencellado ao turismo e ao medio ambiente, oa finalidade de poñer en valor e seguir dando a coñecer a actividade pesqueira e a cultura mariñeira do concello de Cambados. Tamén procura colaborar na creación dun microdestino fundamentado principalmente nun posicionamento diferencial. O seu público obxectivo será a propia poboación local, a fin de revalorizar a propia cultura e a confianza social no desenvolvemento endóxeno, os turistas e visitantes do concello de Cambados e o público xeral.

O patrimonio mariñeiro componse de diferentes vectores: a historia, a etnografía, a cultura, as tradicións, a arquitectura popular, os oficios, as prácticas pesqueiras, a propia rastrexabilidade dos produtos do mar, as conservas, as lendas e contos, os sinais marítimos, a gastronomía, a actividade cultural, a cultura arredor dos muíños …etc. Moitos destes aspectos pasaban desapercibidos para quen se achegaba a Cambados, moitos facendo o Camiño, polo que se pretende, co arranque destas accións, axudar a romper coa estacionalización da demanda turística.