O ForoAcui ten como finalidade fundamental servir de punto de encontro entre a comunidade científica, o tecido empresarial, as administracións púbicas e a sociedade civil, creando un espazo único no que conflúen coñecementos e experiencia. A través deste diálogo aberto e participativo, preténdese favorecer a trasferencia de resultados de investigación ao sector produtivo, impulsar a cooperación entre entidades e fomentar a creación de oportunidades que reforcen a competitividade e a sustentabilidade da economía azul.

Ao mesmo tempo o foro persegue poñer en valor a innovación, a sustentabilidade e a seguridade alimentaria como eixos estratéxicos imprescindibles para afrontar os retos actuais e futuros do mar e das súas rías. Estes piares non só contribúen á preservación dos ecosistemas mariños e a mellora das prácticas produtivas, senón que tamén aseguran a calidade dos alimentos e fortalecen a proxección internacional do sector.