Este proxecto pretende poñer en valor a historia da tipoloxía típica dunha embarcación das nosas rías galegas, aportando tanto os saberes dos Mestres carpinteiros de ribeira como unha parte da nosa identidade, sendo a pesca un dos pilares máis importantes da nosa economía durante décadas.

Coa realización deste proxecto preténdese transmitir a mozas e mozos a importancia que tivo esta embarcación no desenvolvemento dunha actividade, ensinándolles o uso da madeira nas construccións navais, por ser un material pouco contaminante, concienciándoos ao mesmo tempo sobre a conservación dos nosos montes con cultivos de madeira autóctona e dándolles a coñecer as formas desta tipoloxía de embarcación.

Ademais dos valores inherentes a este tipo de embarcacións e da necesidade de catalogar, potenciar e dar a coñecer o noso patrimonio flotante, está a necesidade de achegar ás novas xeracións ao xeito de vida dos nosos antergos, baseado nunha cultura antiquísima, nobre no respecto aos ciclos de vida e insubornable, da que podemos extraer experiencias e modelos de vida que nos axuden a mellorar o presente.