Sorry, you need to enable JavaScript to visit this website.

O Faro de Corrubedo será un Hotel-Restaurante

luns, 27 de Agosto de 2018 - 07:08

 

Grazas á axuda do Galp Ría de Arousa, o Faro de Corrubedo e os edificios anexos serán rehabilitados para a súa explotación como HOTEL RESTAURANTE FARO DE CORRUBEDO, situado nun entorno único próximo á costa, no municipio de Ribeira. Trala rehabilitación vanse prestar unha serie de servizos de hostelería a clientes e viaxeiros que se acheguen a visitar o gran atractivo turístico da zona, dotando as instalacións do faro de Corrubedo e o seu entorno dunha serie de atractivos e servizos que o convirtan nun dos referentes turísticos indiscutibles de España.
 En total, a axuda do GALP ascende a 200.000 euros nun proxecto que ten un custe total de case 1.149.483,87 euros e que proporcionará emprego estable a unhas dez persoas.

A empresa promotora do proxecto, Rianxo Xestión de Empresas SL, xestiona outros dous restaurantes na comarca, o Restaurante Cascada en Ribeira (Camping Ría de Arosa II) e Restaurante Ría de Arosa, en Cabío, na Pobra do Caramiñal (Camping Ría de Arosa I). O obxectivo global do proxecto HOTEL RESTAURANTE FARO DE CORRUBEDO é, sen dúbida, ambicioso, pois non se trata tan só de prestar unha serie de servizos de hostalería a clientes e viaxeiros que se acheguen a visitar o gran atractivo turístico da zona, senón de dotar ao faro de Corrubedo e á súa contorna dunha serie de atractivos e servizos que o convertan nun dos referentes turísticos indiscutibles de España.

Trátase dunha infraestrutura mariñeira e turística única, polo que cobra unha especial relevancia a importancia de protexer o Patrimonio e o Medio da zona e converter este emprazamento nun lugar único grazas á súa situación, contorna e historia privilexiada, compatibilizando os intereses socioeconómicos da poboación autóctona co desenvolvemento sustentable dunha aposta turística e gastronómica desta índole.
 
A recuperación e a posta en valor desta estrutura mariñeira integrada polo faro, as casas dos  fareros e os locais anexos, está plantexada tanto desde o punto de vista arquitectónico como promocional. O obxectivo é integrar o  servizo de restauración e gastronomía no selo promocional de Km 0 de Mar Galaica e Galicia Calidade, polo que o peixe e marisco de proximidade formarán parte  importantísima da carta, que apostará por unha cociña de produto, cun toque sofisticado, poñendo en valor os produtos da zona e as artes empregadas polas traballadoras e traballadores do sector na súa captura. De xeito transversal, o proxecto contempla a posta en valor da cultura mariñeira, e vai aplicar esta filosofía a toda a actuación, desde o respecto patimonial na decoración ata a promoción de actividades turísticas vinculadas ao  mar (paseos en barco, mergullo, visitas guiadas). Tamén se pretende a visibilización nacional e mesmo internacional de Corrubedo, xa que o proxecto entrará nos grandes circuítos Faros de España, Ruta de Faros de Galicia , Margalaica… o obxectivo é que apareza referenciado en todo tipo de publicacións, desde as relacionadas directamente co turismo ata revistas especializadas en decoración.

Trátase de fomentar un turismo desestacionalizado, respectuoso co medio e interesado na cultura do mar . O servizo será realizado os 365  dias do ano, e estará dirixido a un público de alto nivel adquisitivo que queira vivir a experiencia de durmir nun faro. O hotel terá un total de 11 habitacións, 9 delas de nivel 'Premium' e as outras 2 'Suite'. Ademais do restaurante, amén contempla unha cafetería-kiosko con serbizo de xeadería artesanal. En total o Hotel Faro de Corrubedo vai crear arredor de 10 postos de traballo estables no territorio, ademais de contratacións estacionais en tempadas de máxima ocupación.