Hoxe comezou no IES As Bizocas do Concello do Grove o programa de educación medioambiental POR UN FUTURO SOSTIBLE NA NOSA RÍA que o Galp Ría de Arousa vai desenvolver durante todo o mes de novembro en centros de ensino da Arousa Sur e que xa está en marcha tamén nos concellos da Arousa Norte.

Un total de 80 alumnas e alumnos de 1º e 3º de ESO participaron na primeira sesión divulgativa na aula. O obxectivo da actividade centrouse en concienciar ao alumnado de que reducir a presenza do lixo é unha tarefa á que todas e todos estamos obrigados, pois somos nós en maior ou menor medida quenes causamos o problema.  Dentro da unidade didáctica desenvolvida espuxéronse os importantes problemas que están atopando nos últimos anos os habitantes dos océanos, ameazas descoñecidas ata o de agora que poñen en perigo as súas vidas, como a contaminación e a acumulación de lodos, a acidificación do mar causada polo aumento do nivel do dióxido de carbono atmosférico, o aumento da temperatura do océano, e o lixo mariño, especialmente o plástico. A actividade céntrase especialmente en explicar os problemas causados polo lixo mariño como os enredos da fauna mariña, a inxestión e intoxicación con plásticos, a introdución de especies exóticas invasoras, os efectos negativos na capacidade de alimentación, respiración, crecemento e reproducción; e os impactos na sociedade e na economía: xestión dos propios residuos e as perdas económicas en industrias como a pesca, o tráfico marítimo, as actividades recreativas ou o turismo.

Esta actividade completarase nos próximos días cunha segunda sesión a pé de praia na que terán a oportunidade de facer traballo de campo e poñer en práctica os coñecementos adquiridos.