Sorry, you need to enable JavaScript to visit this website.

Sesións formativas en Arousa para mulleres do mar que queiran emprender en turismo mariñeiro

 

O GALP Ría de Arousa, dentro do proxecto Candieira, Rede de apoio e promoción das mulleres do mar, pón en marcha un programa formativo para mulleres do mar e emprendedoras que queiran desenvolver un proxecto de turismo mariñeiro.

A partir deste martes 7 de novembro, as mulleres do mar ou emprendedoras que queiran promover unha iniciativa de turismo mariñeiro sostible que poña en valor a contorna ou que fomente a realización de actividades de lecer, poderán contar co apoio do GALP Ría de Arousa, que a través de Candieira ofrecerá un programa formativo ao longo dos vindeiros meses.

Baixo o lema EMBARCA, esta primeira sesión celebrarase no Recinto Feiral Fexdega entre as 18:00 e as 20:00. A inscrición é aberta e de balde a través da web candieira.net, ou no teléfono 986 510 953.

O programa segue as liñas xerais do proxecto participado por seis Grupos de Acción Local do Sector Pesqueiro, pero adaptándose ao territorio do GALP Ría de Arousa, que abrangue os concellos de Boiro, A Pobra do Caramiñal, Rianxo, Ribeira, Cambados, Catoira, O Grove, A Illa de Arousa, Meaño, Ribadumia, Vilagarcía de Arousa e Vilanova de Arousa. Seguindo a estela do taller de ideas celebrado en setembro, nesta zona brindarase asesoramento a aquelas mulleres do mar ou emprendedoras que queiran levar a cabo unha iniciativa que promova a valorización da contorna, fomentando a realización de actividades de lecer e turismo mariñeiro. Ao longo dos próximos meses, iranse celebrando diversas sesións que desembocarán na posta en marcha dun prototipo ou maqueta da iniciativa.

Candieira guiará as participantes probando como funcionan as iniciativas desde un punto de vista innovador e deseñando como se poden dar a coñecer as iniciativas e como facelas viables.

ALIADAS: impulso á conciliación

En paralelo, o GALP Ría de Arousa organiza para o xoves 9 de novembro unha xornada, tamén no Recinto Feiral Fexdega, entre as 17:00 e as 20:00, que baixo o lema ALIADAS, tratará de explorar as alternativas e posibilidades de mellora da conciliación entre as mulleres do mar. O programa ALIADAS contempla formación en igualdade, xestión de reunións, relacións en rede e cooperación, habilidades de comunicación persoal dinámicas de participación e desenvolvemento e identificación de proxectos, entre outras temáticas.

O obxectivo: reforzar e dinamizar o tecido asociativo de mulleres existente na zona, traballando habilidades sociais e comunicativas e dotándose das ferramentas precisas para levar adiante o seu propio programa formativo (inclusive probándoo na práctica).