O proxecto ten como finalidade remodelar e dinamizar o Mercado de Abastos de Viveiro, reforzando o seu papel como espazo de referencia para a comercialización de produtos de proximidade, a promoción do sector pesqueiro e a dinamización económica e social do centro histórico da cidade.
A actuación contempla unha intervención integral sobre o edificio, situado nun enclave estratéxico entre o casco histórico, o porto e a ría de Viveiro, orientada á reorganización dos espazos comerciais e á recuperación da súa funcionalidade. O proxecto prioriza a posta en valor das peixerías como elemento central do mercado, reforzando a presenza dos produtos da pesca e do marisqueo locais e mellorando as condicións de comercialización destes produtos.
Así mesmo, levaranse a cabo actuacións de mellora da eficiencia enerxética e do confort do edificio mediante a renovación da súa envolvente, a optimización das condicións ambientais e acústicas dos espazos interiores e a adaptación das instalacións aos requisitos necesarios para a obtención do distintivo de "Mercado Excelente", incrementando a calidade dos servizos ofrecidos tanto aos comerciantes como ás persoas usuarias.
De maneira complementaria, desenvolverase unha estratexia de dinamización socioeconómica centrada na promoción do produto pesqueiro local, no fomento do consumo de proximidade e na difusión da cultura mariñeira. Esta estratexia incluirá accións de promoción gastronómica, actividades educativas en centros escolares, iniciativas de divulgación do patrimonio marítimo e campañas de sensibilización sobre a importancia do sector pesqueiro na economía e na identidade de Viveiro, prestando unha especial atención ao papel das mulleres no ámbito marítimo-pesqueiro.
O proxecto promoverá a colaboración entre o Concello de Viveiro, as persoas praceiras, as confrarías de pescadores, o sector pesqueiro, os centros educativos e o tecido asociativo local, consolidando o Mercado de Abastos como un espazo vivo de encontro entre produción, comercialización, cultura e cidadanía.
En conxunto, esta actuación contribuirá á valorización dos produtos da pesca e do marisqueo, ao fortalecemento do comercio local, á revitalización do centro histórico de Viveiro e ao impulso dun modelo de desenvolvemento sostible baseado na economía azul, na conservación do patrimonio e na promoción da identidade mariñeira da Mariña-Ortegal.
Non
Crecemento azul
Cambio climático e transición enerxética a unha economía de baixas emisións de carbono
Creación de emprego e integración social (mulleres, mozos/as e inclusión social)